滾得囍宮廷火鍋小炒

營業中

休息中

天寒地凍，一大班人朋友食飯唔少得緊係去烚下烚下，打下邊爐。見唔少朋友都推介呢間滾得囍宮廷火鍋小炒，用上好得意既宮廷主題，就一齊去試下。食物同湯底都有好多選擇，我地就先叫左個順治特色卜卜蜆鍋，湯底非常鮮甜，用左唔少大蜆，好有海水味，但又冇沙，好乾淨，個湯好味到飲左幾碗。手切牛肉宮廷拼盤，有唔同部位既牛肉，我就比較鐘意安格斯牛肉，油花分明，肉味香濃，肉質嫩滑！另外仲叫左個花雕鮮牛展同花雕雞件，呢到用既花雕好香，酒味適中，唔會太濃。鮮牛展肉質爽口，雞件結實嫩滑，整體都唔錯！至於手打丸類同餃子類都可以揀一份或者半份，份量可以按照個人喜好，值得加分！手打芝心牛肉丸彈牙多汁，入面更有流心芝士，非常好食，不過食既時候要小心唔好爆汁！菜苗帶子餃好足料，每隻都好大隻，味道清新，同湯底好夾！鐘意食香口野既人必試黃金雙拼，有咸蛋炸魚皮同咸蛋炸響鈴，新鮮炸起，好香口惹味，加上咸蛋味好香，一定要試！整體食物好高質，價錢都合理，下次可以再來！