豊勝手丼 (已結業)

今日與姐姐在銅鑼灣逛街，午飯時間來多很多餐廳選擇嘅登龍街，揀咗我哋兩個都好鍾意食嘅日本嘢。呢間餐廳我好耐之前食過一次，印象好唔錯。海之幸丼賣相一流，非常吸睛，一定要打卡。材料非常豐富，有吞拿魚腩，油甘魚，左口魚裙邊，赤蝦，日本海膽，松葉蟹鉗，三文魚籽。吞拿魚腩好濃魚鮮味，左口魚裙邊火炙過，魚油甘香出晒黎，入口即溶，赤蝦爽口鮮甜，日本海膽creamy，冇腥味，三文魚子粒粒脹卜卜。松葉蟹鉗就較為遜色，冇乜鮮味。壽司飯以赤醋調味，軟硬適中，混合埋啲海帶，加上魚生一齊吃，鮮味十足。廚師發板壽司九貫今日食好啲，揀咗omakase 壽司share。手握壽司飯握得實淨唔會散，口感不會過硬非常好。魚生大大件，好新鮮，魚生完全覆蓋壽司飯而且傾瀉出嚟。我食咗帶子，帶子好大隻，鮮甜軟滑。小穴口感綿密，一啲細骨都冇，海膽軍艦好邪惡，佈滿滿滿嘅海膽，甘香creamy海膽輕輕火炙過，令其更香。三文魚腩好肥美，如有魚油甘香。雞泡魚乾熱辣辣，口感好好唔會好硬，本身已經燒得好惹味， 沾少少蛋黃醬吃，更加滋味，好唔錯嘅小食。忌廉蟹肉薯餅炸得非常香脆，內裏忌廉醬混入蟹肉，口感香滑，沾上少少廣島燒上面嘅燒汁一齊食，更加香口。