燒肉臻 (已結業)

今晚同老友開爐燒肉😆😆話呢又有靚牛又有海鮮又有sake 放題，(雖然我唔飲酒) 見到呢度竟然有二三十款日本酒，可以$198, 90分鐘任試，見到都開心。但我都係飲返日本蘋果汁，都好香甜清爽！日本蕃茄沙律做開胃菜，去皮，配蒜蓉薑蓉同醋，清新爽甜。甲羅燒有滿滿蟹膏鮮味，混有蟹肉味噌，鵪春蛋去燒，配梳打餅，蟹香濃郁。一夜干雞翼燒得好考功夫，店員用心幫我地燒好，燒得皮脆肉嫩，完美金黃色。主角之一，芝士燒龍蝦，肉質彈牙，帶奶油芝士香味。鹽燒油甘魚鮫，好厚肉，而且燒得外脆內軟，juicy 肉滑，配酸醋檸檬，帶點清爽的醬汁好夾。牛肉盛合有7款和牛同內臟組合，我最鍾意係和牛背峰，肉質嫩滑，牛肉味香，仲有好少食到嘅燒牛心，唔會有內臟嘅腥味，彈牙爽口。牛脂爆香，值得一提係呢度自制蕃茄洋蔥汁配燒肉燒魚都好夾，唔係下下都甜燒汁咁單調。如果想食高質燒肉，又想有服務坐得舒服，又唔使趕住交枱，呢度係適合同老友飲酒吹水慶祝嘅好地方。