樓下火鍋飯店

營業中

休息中

外國朋友嚟到一定要帶佢哋食呢間好有香港特色嘅火鍋店。門面已經有好靚嘅霓虹燈，入得去仲有魚缸，同埋以前舊式嘅涼茶舖，好有舊時香港嘅味道！呢間火鍋店都有好多唔同種類嘅湯底揀，花雕醉雞，台式湯底乜都有，鴛鴦湯底都只需要加$20。今次揀咗麻辣湯底同埋胡椒豬肚湯底。估唔到湯底都好足料，入面除咗有豬肚之外都仲有好多塊雞肉。麻辣湯底好夠麻！呢個炸魚皮同埋炸紫菜響鈴係必點，好脆，好可口，份量又多，好夠食！呢個花雕肥牛肉肉質好腍好滑，即使淥完之後都好重花雕酒嘅味道，一流！由於同朋友都係愛食牛柏葉之人，所以黑柏葉同白柏葉都各嚟咗一份。感覺上黑柏葉爽口啲，白栢葉就比較腍。要好好控制淥嘅時間如果唔係就會比較鞋口。手打墨魚丸非常彈牙，分量多之餘又好大粒，配埋好爽口嘅蟹籽，超正。蝦滑好新鮮，同樣做到好彈牙，但略嫌份量有d少。食麻辣火鍋點可以唔點鴨血，吸盡湯底嘅精華，軟滑嘅口感，冇得彈！最後叫咗個花枝片，可能唔係太識控制要淥幾耐，所以比較韌。