船皇 (厚福街) (已結業)

對我而言，船皇既船麵食過返尋味既美食，今天去左位於尖沙咀既新分店，睇下水準有冇保持到。對比銅鑼灣分店，尖沙咀店內既行走通道比較窄，不過裝潢仍然充滿泰國既夏天氣息。木製傢私同橙色牆身亦係一般傳統泰國餐廳擁有既元素。朋友第一次食船皇，所以叫左最出名既船皇湯麵，材料非常豐盛，有齊牛腩、牛肉片、牛丸、雞絲、雞翼、豬肉、豬肉丸同豬潤。湯底藥味重帶小辣。麵條方面，朋友揀左河粉，比一般河粉更粗，掛湯能力亦提高。食過船皇湯麵既我叫左船皇撈麵，材料同湯麵一樣咁豐富。職員提醒我食之前要先落醬汁，並且撈勻。辣汁同醬汁撈勻之後，連平時討厭嘅芽菜都變得惹味。眾多材料中，炸豬皮仍然最難忘，酥脆蓬鬆，一啲豬皮既腥味都無。小食總共叫左兩款，泰式炸蝦卷外面竟然有一層炸薯蓉絲，以自己特別鍾意薯蓉所以特別香脆。泰妹雞翼脆卜卜，鹹香十足。旁邊仲有酸辣醬，不過個人認為就咁食已經夠味道。船皇不愧係船皇，湯麵同撈麵各有特色，個人鐘意湯麵多啲。