古今二 (The ONE)

營業中

休息中

朋友提議食呢間日本菜，佢位於The ONE 5樓，一上到去先發現嗰層只係得三間食肆，所以好易搵到！星期一晚，店內食客唔多，環境雅致，燈光幽暗，浪漫氣氛甚濃，好適合情侶二人嚟撐枱腳。侍應服務態度良好，美中不足嘅地方係自覺性不足，無主動為客人添茶，要食客屢次主動開聲要求先會埋嚟加。食物方面，嗌左天婦羅、芝士年糕、牛肉壽喜燒火鍋同埋海膽飯。其中牛肉壽喜燒火鍋最令人驚喜：首先賣相已經好有吸引力，艷紅色嘅牛肉鋪喺鍋物面頭，揭開發現有唔同配菜(冬菇、金針菇、娃娃菜同粉絲)，每次夾起食物擺入口之前蘸上壽喜燒嘅靈魂：蛋汁，真係要高呼一句 Oi-Shi ！另外幾款菜(天婦羅、芝士年糕、海膽飯)味道不過不失。價錢方面略貴，雖然整體味道唔錯，但性價比嚟講都係有啲低。下次有其他日式餐廳可供選擇嘅時候，應該唔會考慮佢。