天龍軒

營業中

休息中

睇電視見到介紹佢嘅叉燒，就搵咗平日嘅夜晚嚟食，電話訂位已經預留定黑毛豬叉燒，試吓係咪有人哋講到咁好食。先講佢嘅食物，叉燒上黎時候熱辣辣，肥瘦均呈，叉燒醬味道偏淡，食到麥芽糖味較多，冧滑得來唔霉，豬肉味濃，但係完全無燶邊，感覺差左啲野。紅酒和牛臉頰有明顯嘅酒味，牛肉連筋腱位炆到起膠夠冧，但整體好似淡左少少，蓮子亦都略嫌硬。蝦多士脆身、乾爽無油，蝦餃彈牙，配埋糖醋汁幾好食。鴿脯兩食。一面係咕嚕整法，其實咁樣食係食唔到鴿嘅味道，同咕嚕肉冇咩分別，都係食個汁嘅酸甜味。另一面喺炒雞髀菇，哩個比較香口，亦都可以食到鴿脯嘅滑同埋獨特肉味。因為係慶祝生日，所以除左美點雙輝，仲送迷你壽包，但壽包皮太實。呢到環境確實好靚，個102樓海景冇得輸，裝潢高貴得嚟幾有摩登中國風。埋單$430 一個人，單論味道就貴，但如果重視環境靚服務好就可以。