胡爐 (已結業)

今日又嚟胡爐打邊爐。正苦惱應該揀咩湯底時，店員推介一款椰子雞煲。生雞先用熱鍋翻炒，加入少少酒，火槍一點立刻火光熊熊。適當翻炒後加咗湯同椰青水，再滾返之後就飲得。咁好味，飲返2碗先開打邊爐。配料方面揀咗安格斯肥牛, 珊瑚蚌，瑤柱墨丸，黑松露蟹肉餃同紫菜響鈴。瑤柱墨丸係第一次食，真係有見到瑤柱，絕無欺場。黑松露蟹肉餃保持一貫水準。紫菜響鈴係必點，因為唔係度度有。嘢飲點咗一瓶青檸梳打，2個人分真係好夠飲，有好多杯。