魔膳廚房 (已結業)

上網睇到魔膳廚房有個假日午市自助餐，$88可以食足兩個鐘，幾抵食。比起其他觀塘樓上餐廳，我猜呢間餐廳最大嘅賣點，一定係佢嘅地理位置：一起觀塘地鐵站B3出口，行一分鐘先到業發大廈一期！唔好睇少$88自助餐，菜式方面都做得好足。首先有個salad bar，沙律、水果、冷盤都有，可是每類嘅款式選擇都唔會太多了。炸物方面，有炸紫薯、咖哩角、雞翼、薯角、洋蔥圈等等。旁邊仲有六種醬汁可選擇：茄汁、燒汁、黑椒汁、泰式辣醬等等。我自己最鐘意炸紫薯，一嚟平時少食到，二嚟佢真係外脆內軟，即刻食完一舊都唔會覺得好濟，甜甜少好好食。是日餐湯就係黑松露忌廉蘑菇、意式雜菜湯。呢個係我第一round嘅戰利品。主菜方面都有十多款選擇。我最滿意係龍蝦汁海鮮意粉，非常足料嘅海鮮，爽脆嘅大蝦、青口、魷魚。仲有白汁芝士龍脷柳，非常之淋，入口即融。另外，每人包咗一杯飲品，我點了mocha，上面仲有好可愛嘅狗仔腳印。美中不足嘅係，我希望可以有多啲甜品嘅款式，咁就啱哂我啦～