新仙清湯腩咖哩專門店 (已結業)

Jumbo牛五寶湯河:見到餐牌樣樣都想試,最後決定叫呢個樣樣都有既牛五寶黎試,五寶有牛脷,牛肚,牛腩,牛筋,牛尾,份量都幾多,價錢絕對合理,先飲一啖湯,唔太咸,清清地。牛脷鮮嫩,入口軟淋,牛尾軟爛入味,牛筋滑嫩爽彈,食落好多膠質, 牛腩燜得透且鬆化入味,肉味很濃,河粉亦爽滑，都幾好味。金牌咖哩薯仔三寶飯:朋友話呢間咖哩都好出名,就叫個常餐咖哩薯仔三寶飯黎試,三寶有牛腩, 牛肚, 牛脷,份量十足,1個女仔點黎食一定食唔晒,食落咖哩好香濃,不過帶少少酸,唔知係咪正常,牛腩同樣燜得透且鬆化入味,牛脷軟淋,牛肚爽彈,不過俾咖哩味蓋過左佢地既牛味,所以個人都係比較鐘意五寶湯河多D。蜂蜜薑汁薏米:夏天叫呢個真係無得輸,薏米份量都幾多,食落仲好有口感,再配埋清甜既蜂蜜,好解喝。紅豆奶茶:同一般茶餐廳飲既差唔多,不過加左紅豆落去,唔特別,而且咁岩我同朋友叫個杯D紅豆有問題,好似出潺,可能無咩人叫,加上夏天放得太耐,下次都係叫返D正常飲品會好D。