Tom N Toms Coffee (已結業)

今日係荃灣返工，意外發現左呢一間主打韓式食物既 Cafe。除咗Cafe一定有嘅咖啡之外，仲有唔少沙冰同特色嘅韓式飲品。我同同事嗌左一人一杯飲品，分別係接骨木花伯爵茶同甘薯鮮奶。我唔想飲太甜膩既飲品，想揀啲清新小小嘅，呢兩款飲品就岩曬我心水。我自己就偏向鍾意甘薯鮮奶，呢度既甘薯鮮奶係我飲過最好飲嘅一間。甘薯鮮奶唔會好甜，兼充滿既甘薯香氣，飲落去唔會覺得好「假」，係天然既甘薯味，鮮奶同甘薯兩樣野好夾。而接骨木花伯爵茶再order少甜就岩岩好，味道好清新，兼有茶香，幾特別既味道，平時都好少可以飲到。呢度除咗焗意粉之外，仲有吐司同埋pizza。我地就一人點左一款薄餅，特別係忌廉粟米牛肉薄餅同墨西哥雞肉薄餅。一見到即刻心心眼，因為我最鍾意就係呢款薄脆嘅餅底，咬落去脆卜卜。忌廉粟米牛肉薄餅鋪滿香甜既粟米🌽，而墨西哥雞肉薄餅個醬汁就再濃啲，惹味啲。而且呢個價錢都尚算幾親民，分量亦都幾足，一至兩個人食都冇問題。