胡爐 (已結業)

本來食火鍋要人多先高興，不過現在四人限聚只好靜靜地食個鍋，不過現在的餐廳都好聰明，座位及餐椅設計兩個人都可以食。姐夫加班，今晚孖我家姐來撐枱腳，有料湯底及食材都好好，我們食得飽飽滿足，已經諗住幾時與姐夫再來。我哋揀咗此店限定的金翅花膠乳鴿湯，見到個名已經好吸引，有邊位靚女唔鍾意花膠湯唔鍾意金呢？而且無論在家在外好少飲到乳鴿湯。唔係妙齡乳鴿所以乳鴿都幾大隻，煮好之後一分為四兩個人好夠食，味道呢梗係好啦，我哋食晒冇浪費；個湯仲好飲，兩姊妹都好鍾意南瓜湯又有益又甜。現在話要先食菜，胃內隔油隔脂肪我哋都照做，點了基本的素菜籃，可能是啲湯甜所以連菜都好好食。今日想食多啲海鮮所以點左馬刀貝，隻隻大隻肥嘟嘟，一見開口一陣就食得，因為個湯夠清又有南瓜味，唔使點醬已經甜。跟住又食鱔，牛肉必吃，仲有肉丸，基本配搭。