寶寶雞煲 (已搬遷) 新店位置

琴日同朋友食生日飯，兩個人想多啲野食就去左太子既寶寶雞煲，既可食雞煲，食完雞再加湯邊爐，多選擇又可以食多唔同既菜。一開始叫左半隻奇味雞煲，雞揀左新鮮走地雞，個雞煲一上香味撲鼻，聞到都已經想食，佢用左蔥，疆，醬料爆香左，啲雞好新鮮，唔會太老，口感非常好，再加上小小辣味，令你胃口大增。食完雞就加湯邊爐，我地就叫左美國肥牛， 鵝腸，海蝦，馬尾粉絲，雜菜。美國肥牛，牛肉味好濃，好大碟，一入口牛肉味成個口都係，正。鵝腸，超肥美，仲有好多肥膏痴住，講真我中意食肥鵝腸，相信好多人都係，因為鵝腸宿水得好快，如果夠肥，熟之餘仲會有口感，唔會唔知食咩咁。海蝦都好新鮮，唔會梅，即脫殼，非常鮮甜。粉絲同雜菜最尾食，等個湯吸收哂雞煲，牛肉，海蝦海鮮味，然後菜同粉絲吸返哂呢啲味，唔駛落醬油好好味。