到此一遊

營業中

休息中

.應該係依期最後一間介紹嘅長洲黃店啦。長洲有早餐提供而又係黃店嘅其實唔多。今日就要介紹依間到此一遊。餐廳有戶外位，帶狗黎絕對無問題。坐戶外位都唔會曬住，都唔算太熱，我地叫咗雞扒煎蛋火腿，餐包揀咗牛角包，唔鍾意嘅話揀菠蘿包都得。另一個餐叫咗吉列豬扒煎蛋火腿。首先講下雞扒，雞扒水準一般，雞肉有少少乾身，就算點住雞扒汁黎食都食得出佢好乾。煎蛋火腿就無咩值得講。吉列豬扒份量都有返咁上下，味道正常，都食得出外脆內juicy。雖然豬扒唔係厚切，不過呢個價錢算係咁啦。反而兩款包好值得介紹，菠蘿包皮好脆，包身好軟熟，份量好大。牛角包外皮好脆，咬落好鬆軟，食到一層層嘅口感，相當高水準。跟餐要咗個迷你番茄肉碎通粉，話就話迷你，份量好大碗，通粉份量好多，雖然唔好多肉碎，不過個蕃茄湯底好濃，夠足料。