御膳

營業中

休息中

觀塘，無論係日抖定夜晚，都係一個熱鬧既地方。而今次食飯既地方，就好似隱藏係鬧市中既廚房，俾我同我既朋友一個歡聚的地方又有少少既空間感。 位於敬業街既御膳，門面裝潢都好簡單，雖然搵唔到招牌，但係呢度的確係臥虎藏龍，食物的質素同廚師既手藝都有水準，佢地拿手整海鮮。 首先係湯，點左個什菌大蜆豆腐湯，蜆肉質鮮甜無沙，豆腐嫩滑，成個湯都鮮甜唔腥。 前菜係麻辣手撕雞，唔算好辣但好開胃。 再黎金銀蒜蒸新鮮蟶子，蟶子大大隻，金銀蒜既味道完全帶起蟶子既鮮味，最緊要要食埋D粉絲，完全吸收哂蟶子D精華，唔食係一大損失。 之後係花龍蝦兩食，1隻係香煎，另1隻係芝士花龍蝦。香煎就爽口彈牙，芝士就香濃得黎又會蓋過龍蝦味道。 緊接住金銀蒜蒸龍躉腩，龍躉肉滑唔腥，咸淡適中。 士多啤梨骨酸酸地，醃得夠入味，食多件都唔會溜。上湯浸時蔬就清爽，正好係大魚大肉後清清腸胃。 臨到尾聲，就係招牌既御膳炒飯，有帶子、蝦、豬肉同菜，一D都唔馬虎，又可以填飽個肚。 最後仲有雲呢嗱布甸，為今晚豐盛既晚餐寫上句號。