醉胡爐 (已搬遷) 新店位置

成日都話要減肥，食少啲，但係又心思思想食火鍋，好似今晚，嗰邊爐鬼又出咗嚟，諗都唔諗就去。我哋揀咗位於尖沙咀嘅醉胡爐，之前都有同朋友嚟食過，覺得佢嘅湯底幾特別，同埋啲配料都幾新鮮好味，所以今晚再回頭。上次試過佢哋嘅龍蝦湯底，味道非常濃郁，超正。今次我哋揀咗椰子雞湯底，佢哋用上鮮雞半隻，整個椰青，再加上一啲上湯，一滾起已經非常清香，椰香味十足，二話不說，一人即刻飲咗兩碗，鮮甜好味，雞肉亦非常嫩滑另外我哋亦叫咗一個牛肉拼盤細份$388，足夠兩個人食，有牛舌芯，牛胸爽，安格斯手切牛，極上手切牛同霜降牛前粒，當中最牛粒同牛胸爽，牛粒有牛味，唔靭，夠諗。牛胸爽，輕灼之後，入口爽，唔肥唔油，極品手打芝士牛丸半份有四粒，新鮮手打，夠彈性，裡面嘅芝士唔算太濃，但係咬落去有爆漿嘅效果 熱辣辣嘅芝士汁噴射出嚟，所以食嘅時候要小心。卜卜蜆份量不少，新鮮，無沙。其他配菜叫咗鮮冬菇同埋荳苗，都非常新鮮好食。