鼎王麻辣鍋 (金巴利道) (已結業)

一直很喜歡吃台式的酸菜麻辣鍋，位於尖沙咀的過江龍-鼎王麻辣鍋，今晚終於有機會試了！落樓梯就見到餐廳門口，由於社會肺炎疫情關係，職員先幫我們量體溫以及請我們用搓手液清潔雙手後才入座，另外給予我們每人一個信封放口罩，以確保客人健康，認真貼心！職員先詳細向我們講解點餐過程，然後我們就用平板電腦去揀選湯底及配料，所有食物圖文並茂，夠晒吸引。這裏的招牌湯底鴛鴦鍋中包括麻辣鴨血鍋以及酸菜白肉鍋，仲有得揀選酸辣程度，口味可以自己選擇。我就揀咗小酸小辣，飲一啖酸菜白肉湯底好開胃，酸辣味道啱啱好。火鍋配料的綜合餃，當中我最鍾意嘅蛋餃夠晒台式風味，原來係由台灣店直送來香港，入面嘅餡料又夠哂足料。打邊爐最鍾意將啲菜浸落湯底，可以索哂佢嘅精華味道，所以油麥菜都好入味。我朋友係大胃王，而火鍋店更提供白飯任裝給客人，佢就自己特製左一碗麻辣酸菜白飯，夠晒滋味呀！其他配料同樣新鮮美味。最後我哋兩個人埋單都只係$800，每人平均消費$400，就可以享用媲美台灣的服務及食物質素，感覺值回票價，所以都會推介身邊朋友去試吓。