味道農家雞煲王海鮮小炒 (已結業)

前嗰排天氣唔好打颱風，冇得出去玩，終於等到好天，就決定同朋友欣賞下比較偏遠市區既地方，於是我同朋友就去咗馬灣玩，仲可以去沙灘游水同曬太陽。至於馬灣有咩好嘢食我哋都唔太清楚，而最後我哋就決定咗係沙灘附近嘅商場2樓食一間雞煲，感覺上比較多人去食，而且菜式選擇多，除咗一般嘅雞煲打邊爐之外，仲可以叫唔同嘅小炒，任君選擇！我同朋友兩個人最後叫咗半隻雞同一碟蒜蓉炒時菜，雞煲雖然係半隻，但份量都幾多，兩個人食都好足夠，而且雞肉鮮嫩，唔會熟過頭，加上醬汁調味幾入味，辣度仲可以自己選擇，食唔到辣或者想食好辣都有得揀。至於個蒜蓉炒時菜都好重蒜蓉味，而且當日既時菜仲係我最鍾意食嘅生菜，配埋白飯食就剛剛好！最估唔到嘅係食到7788嘅時候，原來仲送甜品添，佢哋今日送嘅甜品係椰汁西米露，雖然個椰汁西米露唔係凍冰冰，而係熱嘅，但係免費來講幾好食，而且西米數量都多，唔會剩係得椰汁個種！整體而言，間餐廳坐得幾舒服，而且傾計傾幾耐都冇問題，加上選擇都幾多，下次如果來馬灣嘅話都可以選擇去食下，價格唔算貴都幾合理，吾錯！