寬巷子 (已結業)

過江龍嘢飲飲得多，過江龍火鍋就食得少，今次同火鍋朋友興緻勃勃咁想試寬巷子嘅火鍋，就係想知點解佢咁出名。點咗紅泥小染同養生白鳳，中間嘅圓形有一邊有小孔，令小染鍋嘅辣味唔會越食越淡。小染有鴨血同豆腐，白鳳就有蟲草花同烏雞。山渣紅果汁非常解渴，入口到喉嚨有沙沙哋嘅甘甜同酸意，開胃醒神。甜甜圈係喺蝦膠上面有啲果仁粒，咬落彈牙，入面有少少流心嘅芥末饀。蝦肉餃子非常彈牙鮮味，飽滿嘅內饀配上薄滑嘅外皮，無論落小染定白鳳都非常好味。枝仔冰上面有少少桂花醬，下面係包得緊緻嘅魚膠，保持彈牙口感，仲要有變化，令人不失驚喜。墨條牛軋係墨魚滑加上墨汁而成，冇枝仔冰咁彈牙，但更為鮮香，個人覺得落小染鍋更加好味。玫瑰松坂豬係整個加上蛋白放入去鍋度煮，雖然我少食豬但都感受到佢嘅肉質非常鮮嫩，久煮都冇乜問題。加上成個玫瑰放入鍋嘅視覺效果非常出色。花團錦簇嘅視覺效果比玫瑰松坂更加出色，裡面嘅菜種亦都不少，新鮮甘甜嘅旺牙白依舊係我最愛。