四姐川菜

營業中

休息中

四姐川菜可以算是私房菜與餐館之間。菜式款式多，但因為係按人頭劃一收費，所以當人唔多時自然想揀晒肉類。但必需提大家嘅係套餐唔跟飯，如果一定要有澱粉落肚記得揀返碟涼麵之類。同埋如果唔主動要求辣度，會一律定為迎合一般人口味，提香少提辣嘅風味。一定要注意！如果唔想蝕餸又想飽肚，不妨叫水煮類。呢煲水煮牛肉入面有薯粉，薯粉好難得咁做到黏韌但咬得開。水煮牛同我平時食嘅唔同，好重面豉鹹味。濃味控就啱晒。辣子雞軟骨係懶人之選。平時食辣子雞要喺堆辣椒度搵雞，仲要吐骨真係好煩，食雞軟骨爽快得多。杏鮑菇鴨胸好夠鑊氣，菇吸晒啲鴨油，但單食鴨胸就會鹹咗啲。蒜泥白肉偏甜，蒜味好重。薄薄嘅豬肉吸晒味，正。口水雞同蒜泥白肉調味相近，偏甜但好食。問心去過咁多次雲南同四川，四姐嘅香料係似足當地，用上唔少花椒同乾辣椒。但畢竟遷就咗港人口味會冇咁辣，廢事大家食唔到浪費食物，但想正宗同加辣嘅務必同店員講聲。