一鍋豐 (已結業)

今晚朋友飯局，特登約左去旺角創興打邊爐。老實講，去親旺角打邊爐，通常都係失望既，不過今晚朋友誓神劈願話今次一定唔會失望，好！講到咁巴閉就即管試下你係龍係鳳！上到去，咦！新裝修新舖頭喎！攞個餐牌睇睇先，先叫左個大魚頭湯底，再黎試試佢個象拔蚌餐，學啲世叔伯話齋，伏唔怕中，最緊要豪！川弓天麻大魚頭鍋！都幾濃味，香料十足，堅係成個大魚頭開邊放晒落個鍋。撈出黎一睇，哇塞！嗰對魚眼烱烱有神！氣勢十足！！個餐包海星斑片、即開生蠔、大頭蝦、鮑魚、珊瑚蚌、貴花蚌同聖子，雖然個海鮮拼盤唔係任食，但份量係夠既。之後上嘅任食料都幾新鮮，完全唔係hea 你，唔錯唔錯。牛肉、豬肉片，脆鯇同啲丸係好食既，加埋個任飲，總括黎講，呢餐抵食好滿意！