鮨一 (厚福街)

營業中

休息中

老闆話請食飯，當然要揀一間好野食。上網見到有朋友去過食omakase，所以我今次叫左老闆去呢度。一上到去，就被安排坐係壽司枱前面，呢個位置好適合食“師父發板“，可以睇住師父整壽司。 首先上既係鮨一沙律，入面有新鮮既三文魚，八爪魚刺身，蟹子，再加上菜同酸酸地既日式醬汁，成件事非常配合。接住黎既係上錦繡刺身，有八款刺身係入面，全部都係常見既刺身，但係全部都非常新鮮，特別係劍魚腩，夠曬肥。鏗魚亦非常好食。之後係燒章魚，有炭火既味道，咬落去非常彈牙爽口，加上日本既蛋黃醬，絕配。跟住穴子壽司，一開始睇個名唔知係咩黎，原來係鰻魚。上網一搵，海入面生長既係穴子，淡水既先叫鰻魚。穴子燒得岩岩好，咬落好有咬口，魚肉好有咬勁。之後就係主菜，又係刺身！一大盤刺身上面有活北寄貝，粒貝，針魚同埋池魚.。針魚係細細條銀色既魚，有另外既酸酸地醬汁點黎食，魚肉既味道好特別，好結實。其他全部都係非常新鮮，兩個人黎講份量都幾多。最後仲有個鮨一千層海膽丼，一大堆海膽係飯上面，份量用d飯差唔多，仲有紫菜比我地，用紫菜包住一海膽同飯黎食，每一啖都好似食緊壽司咁。