靚煲皇 (已結業)

四個老友在朗豪坊睇完戲成10點鐘，天寒地凍搵嘢食，一於去老友介紹嘅靚煲皇！佢話我哋鍾意食辣嘅最適合去食酸菜魚鍋。以前住過旺角，所以知道塘尾道呢個位置，其實係旋轉樓梯底行入去，發現佢開埋門口室外位置，感覺幾正，不過其中一個朋友怕凍，堅持要等室內位！嘩原來星期一咁夜都咁爆場，好彩等左10分鐘就有位！酸菜魚鍋其實都好辣，檢查一下佢的材料，嘩！乾濕辣椒竟然用咗好多不同嘅款式！勁！而且佢選用咗冬季最肥美嘅鯉魚，啲肉好鮮甜，仲有好多魚春！好食到連魚頭同骨都損晒！接住落黎加清湯打邊爐，火鍋配料最重要係肥牛，今次叫咗極上肥牛！靚到冇得彈，脂肪均勻牛味香濃！其餘嘅火鍋配料都係非常之新鮮的！消夜通常好少食咁飽，但係太好味，所以全部清晒！期間一位貌似老闆的斯文四眼男士，見我地清唒d食物，有禮地問我地要唔要再加野食！我哋大讚佢啲火鍋食材好味，牛肉靚，手打牛丸同水餃云吞正！佢好客氣咁話無他嘅，火鍋店一定要注重食材夠靚夠新鮮，呢個應該就係這店成功之道！難怪咁多客人捧場！