胡爐 (已結業)

好耐都冇打過邊爐，始終疫情都有啲驚，不過依家都緩和咗，係時候又要出動返。今次就同朋友嚟咗呢間胡爐，上網都有好多好評，特別佢哋嘅湯底好似好正咁，見到都想流口水。我哋就叫咗金翅花膠乳鴿鍋，睇張餐牌好似係得呢一間先有呢個咋，銅鑼灣店限定，一想到枱成個鍋金黃色好靚，上邊都有好多翅，仲有大大隻乳鴿，營養豐富，好過平時打邊爐嗰啲沙嗲化學湯底 。呢個湯底都好抵讚，飲落非常之濃郁，湯底好鮮甜，唔係誇張最少飲咗10碗，淨係飲湯都飽晒😂😂廣島蠔，$88有八粒，都幾抵食，大大隻，又唔腥，掂埋啲醬汁一流。胡爐牛大拼盤，$498，雖然價錢稍為有啲貴但係份量超級多，一共有五款牛，分別係牛胸爽，牛舌，牛柳粒等等，牛胸爽成塊白色嘅第一次一次食，食落去好有牛油香，邪惡肥得來都幾正，牛柳粒估唔到打邊爐都幾好食，重牛味，總括嚟講呢間打邊爐都幾高質素，特別係佢嘅湯底真係飲到停唔到口。