影片
更多
2019-05-21
1429 瀏覽
今年嘅生日超豪慶祝，去咗食黃埔嘅鮨文，仲要叫咗貴價嘅果嗰set，超好食嘅體驗一定要share一下。一早已經訂定位，識食omakase嘅一定要坐吧枱，可以一路睇住師傅整壽司，聽下佢介紹每一種魚嘅來源地，整嘅方法，品嚐每一件最新鮮做起嘅壽司。三文魚子蒸蛋三文魚子用咗醬油漬，比起一般食到嘅三文魚子啲甜啲，唔會腥，同比較淡味嘅茶碗蒸好夾，做到相輔相成的效果。裏面嘅材料用咗比較獨特味道嘅貝柱，令到成個茶碗蒸好有海鮮嘅味道。前菜有三款唔同嘅漬物，牛蒡漬用咗鹽水醃，令到個牛蒡更加爽口，但係味道唔鹹，反而帶點酸，好開胃。淮山漬用咗wasabi醃，淮山本身有d黏液，好似秋葵咁，呢啲物質對身體好好，食多啲都唔怕，淡淡wasabi味道一d都唔嗆鼻，反而係清新刺激嘅感覺。醃蘿蔔酸甜爽脆，凍凍地好清新，酸酸甜甜嘅比較開胃。另一道係根島既春香蠔，呢一款蠔係少海水味少鐵礦味，但反而更食到個蠔味，個汁都清澈啲，蠔身呈現奶白色脹卜卜，加咗辣粉更加調起咗個鮮味，蠔肉好rich好thick，鹹鹹地，一咬第一下好甜。隔離係螢光魷魚配上蛋黃醬醋，個蛋黃醬醋用咗流心蛋黃，味道又甜又酸，剛好蓋過左魷魚腥澀味。下面係黑梅貝螺，用咗日
一早已經訂定位，識食omakase嘅一定要坐吧枱，可以一路睇住師傅整壽司，聽下佢介紹每一種魚嘅來源地，整嘅方法，品嚐每一件最新鮮做起嘅壽司。
三文魚子蒸蛋三文魚子用咗醬油漬，比起一般食到嘅三文魚子啲甜啲，唔會腥，同比較淡味嘅茶碗蒸好夾，做到相輔相成的效果。裏面嘅材料用咗比較獨特味道嘅貝柱，令到成個茶碗蒸好有海鮮嘅味道。
前菜有三款唔同嘅漬物，牛蒡漬用咗鹽水醃，令到個牛蒡更加爽口，但係味道唔鹹，反而帶點酸，好開胃。
淮山漬用咗wasabi醃，淮山本身有d黏液，好似秋葵咁，呢啲物質對身體好好，食多啲都唔怕，淡淡wasabi味道一d都唔嗆鼻，反而係清新刺激嘅感覺。
醃蘿蔔酸甜爽脆，凍凍地好清新，酸酸甜甜嘅比較開胃。
另一道係根島既春香蠔，呢一款蠔係少海水味少鐵礦味，但反而更食到個蠔味，個汁都清澈啲，蠔身呈現奶白色脹卜卜，加咗辣粉更加調起咗個鮮味，蠔肉好rich好thick，鹹鹹地，一咬第一下好甜。隔離係螢光魷魚配上蛋黃醬醋，個蛋黃醬醋用咗流心蛋黃，味道又甜又酸，剛好蓋過左魷魚腥澀味。
下面係黑梅貝螺，用咗日式辣汁去煮，肉身爽口實淨，新鮮得來好有口感，有啲辣酒煮螺既感覺，得一粒唔係好夠喉。
下一款係稻草燒春魚，再配埋蘿蔔蓉去膩，有濃濃嘅煙薰味，特別係魚皮部份，燒到脆卜卜，好有草嘅味道，魚質似池魚，腍腍地，用咗好淡嘅醬油，唔會搶魚既味道。
跟住係清蒸鮑魚配鮑魚肝醬，用咗大分既鮑魚，再用清酒蒸到熟，令到成個鮑魚都我有好濃烈嘅清酒味道，而且肉質啱啱好，一啲都唔韌，清酒甜帶微苦，本身已經好入味，用少少鮑魚肝醬已經足夠。鮑魚肝醬嘅味道好濃，鮮鹹得黎帶d微酸，有啲似蟹膏，但又比蟹膏再幼滑d。剩低好多鮑魚肝醬唔怕嘥，師傅會比一舊飯仔，將剩低嘅鮑魚肝醬都甜埋黎食。
之後係海膽拖羅多士，係一味好奢侈嘅食品，多士用咗蘋果木煙薰，淡淡的蘋果清香再加濃厚嘅Smoky味道，另外係用左好多海膽拖羅，多到食食吓會瀉晒出嚟，海膽好甘甜，令人食過返尋味。
最後一道前菜係北海道栗蟹，呢一款蟹比毛蟹更香，係5月時令食材，師傅清蒸左隻栗蟹，保留左原汁原味，撈埋本身嘅蟹膏一齊食，蟹味會更加突出。
之後就到壽司嘅部份，第一道係石垣鯛，用左岩鹽去調味，無需醬油，呢款鯛魚肉質腍腍地，好creamy，而且味道較濃，d魚油一咬就必出黎。下一味係縞蝦，呢款蝦嘅蝦紅素好多，用手掂一掂好容易會染晒紅色，呢一種蝦紅素係抗氧化嘅，同車海老，牡丹蝦合稱三大名蝦，上面加咗本身縞蝦啲蝦子，再用橘子皮調味，味道好夾，酸得黎甜又無澀味。
下一道係愛媛蜜柑鯖，居民當地嘅鯖魚食蜜柑大，令到魚肉無腥味，食落又甜又清新，鯖魚本身帶點微酸味，好快壞，幾小時內食用肉質先會亮晶晶。
之後係黑目魚，用咗網燒令到成個魚身有炭香，肉質好有咬口，非常彈牙，連魚皮魚香出好多，再加上辣蘿蔔蓉，刺激得來亦可以中和油膩感。
後面係新鮮既北寄貝，同平時見到紅色嘅唔同，新鮮嘅係藍色，重要打一下會肌肉收縮，師傅特登喺面前打俾我哋睇，成個感覺好似生積咁，好有趣，貝身好甜好彈牙，好似象拔蚌，但又比象拔蚌厚身啲。今日嘅重頭戲拖羅，加咗萬能葱同好多wasabi，但魚油夠多嘅關係令wasabi一d都無嗆鼻，反而更加食到wasabi香味，另外壽司掃咗蒜味醬油，都係用嚟減低膩感。
平時嘅我唔係好食鰻魚，但係呢款穴子肉質幼細，用上咗自製嘅鰻魚汁，完全食唔到有骨，而且肉質軟腍腍，同一般食到嘅鰻魚好唔同，係我一定會返點嘅穴子壽司。
對唔住今晚嘅重頭戲應該係呢個，歐洋水產大極上馬糞海膽，師傅話呢款海膽產量好少，要真係識人先攞到，連個包裝都用咗友襌折，每一盒都係獨一無二既包裝，呢一款海膽完全食唔到腥味，極甜，甜過平時食到嘅海膽好多，而且個質感好rich，食完個after taste好重，可以維持好耐。
最後嘅手卷係拖羅墨魚加蝦，成個配搭已經好奢華，仲要特登喺我哋面前燒左啲魚油去將呢三款材料溝埋，成個手卷實在好多層次，好難去形容究竟有幾好味。最後就到魚湯，用咗魚骨煎香再加小小鹽𤉶成，因為有大量魚骨嘅關係，啲骨膠原多到起左層膜，落去個口好似膠着咗咁，勁正。
最後都仲係令人好期待，今次嘅生果有山形櫻桃，比一般嘅大粒啲，色澤冇咁紅，但係食落好香，唔係淨係一味得個甜度。另外係師傅大力推介嘅宮崎太陽之子芒果，同一般嘅芒果唔同，呢一隻係紅色皮，識落有一種說不出嘅香味，有少少似桃，係我食過最好食嘅芒果。
最後就係靜岡蜜瓜，呢個夠晒甜唔使講，原來蜜瓜越熟係越透，見到入面嘅紋理就知道呢一個蜜瓜甜到咩地步。
呢一個$1980嘅set，睇落唔算平，但係食匀日本每個角落食最好食幾食材，有氣氛有格調，生日就係要咁過㗎啦。
張貼
