新泰東南亞餐廳 (已結業)

身在銅鑼灣，想食咩菜式既餐廳應有盡有，揀左泰國餐廳，7點半已經有唔少人食緊dinner。好特別，餐廳竟然有卡位，而且好有格調。先上椰青($42)，有好厚既椰肉，椰子水清甜，不過椰肉略為消淡。南瓜焗海鮮飯($108)有3款海鮮，包括青口，蝦及魷魚，面頭有d咖哩南瓜汁，焗飯乾身，飯粒粒分明，焗完唔會軟綿綿，唔會太多水份。而且每啖都食到海鮮材料，仲可以任你挖南瓜肉，送飯一流。鐵板蠔仔蛋($88)最有睇頭，因為d蠔大隻到估你唔到，食極都仲有蠔。同台灣最大差分別係，台灣柯仔煎落好多麵糊，但尼個係純蛋漿，所以食落唔會厚粉。成個餸份量多。拼盤有分大細，細($98)，有齊2款炸餅，各款4件。蝦膠打得好彈牙，外層炸得夠脆，香茅肉餅既肉好厚身，加入左好多香茅，食完好邪惡。炸物小食唔熱氣，熱辣辣，香口，但唔油膩。加埋甜酸辣醬，就更惹味。燒鮮菠蘿($58)，燒完好甜，大大件，邊邊位有dd燒焦，但冇損菠蘿既甜味。又一解渴之選。