九記牛腩

營業中

休息中

嚟到必食嘅係牛腩伊麵！我覺得呢度嘅牛腩唔係太特別，每舊水準參差，有D係軟嫩嘅，但有D就幾韌，好多做牛腩嘅都可以有呢個水平。我最中意嘅係佢嘅湯底同伊麵~雖然係清湯但并唔平淡，值得飲到見碗底。伊麺亦比平時食開嘅幼細同香。呢度嘅咖喱都好正，但偏辣。記得上次嚟點咗個咖喱牛筋腩麵。雖然我一向嗜辣都辣到除咗辣之外感受唔到其他，要另加一碗上湯中和翻，引來旁人側目，仲要俾朋友笑我：“個阿叔想同你講，小姐~我哋D牛腩唔係咁食架~”根據我唔怕面懵默默觀察一輪之後有所得著。今次我醒喇，學其他人咁調轉叫清汤腩另加咖喱汁，調教到自己鍾意嘅辣度，終於食真喇，真係好好味！食嘅同時有位企堂阿叔不斷爆粗講人壞話，只可以當成係親民老字號食店嘅特色之一，我都唔係太介意，個阿叔有句講得啱：“你當呢度係四季啊！”上次杜汶澤喺「康熙來了」介紹過嘅爽腩比上年又升咗價叫價一百大洋，而且我下午茶時間嚟到仲未有供應，想食真係要講緣份…總括嚟講係好食嘅，但係現時嘅出品都係同佢享負盛名有段距離，畢竟真係做牛腩起家家嘛，掙扎好耐都係俾個哈哈笑啦。希望繼續保持水準唔好繼續倒退就好。