誠拉麵 (已結業)

康怡入面有間新的拉麵店，見唔係好多人就試試佢~開放式嘅餐廳範圍，座位有限，如果坐遠少少既台，餐廳會提供有一個震動通知器，話你知個拉麵準備好。頭先我揀左第一碗係白 - 豬骨拉麵，湯底豬骨味濃但唔會太油膩，食到最後我都飲晒啲湯。拉麵掛湯力頗強！叉燒肥瘦平均，肥膏部份入口即溶，瘦嘅又唔會乾真真，肥瘦一齊咬，口感啱啱好！叉燒面仲搽左少少醬油先燒，令味道更精緻，好彩我有追加多份叉燒，真係食完仲想再食~~另一碗係豚骨味增，顧名思義，湯底混合左豬骨同味增，聞起來香飲落好濃，好似仲食到小小薑味，有極微微辣味，質感有少少creamy，幾得意~ 佢哋揀嘅味增醬應該係高質產品，鍾意濃味就啱晒。每碗拉麵都有半隻半熟蛋，為拉麵提升層次，而隻蛋都同一貫流心蛋一樣咁好食。見佢寫係用日本蛋，心理上覺得果然唔同呀！個餐我加左餃子，餃子皮邊煎得脆卜卜，食落幾有口感。誠 拉麵真係誠！有誠心同誠意整好一碗拉麵！