私房菜館以圓枱為主，最啱同一家大細聚餐。店員殷勤嘅服務態度，介紹每一道菜色，令你有賓至如歸嘅感覺，
先上冷盤，係涼伴黑木耳及鮑魚菇，有啲醋調味，兩樣都好爽口。
之後在上前菜，有機沙律菜配芝麻醬，仲有新鮮嘅車厘茄，酸味味份外開胃。
第一道菜，賣相已好精緻，係茶燻流心蛋配黑魚子醬伴厚切茄子，流心蛋有茶燻香味，糖心蛋漿口，還有厚切茄子面有炸過脆漿，配以底下既甜醋，令本來淡味既茄子帶出香味同脆口。
之後上原盅海底椰川貝燉鱷魚肉湯，飲了超級鮮甜，見到有足料嘅瘦肉，仲有一大片鱷魚肉，鱷魚肉唔會好鞋口，淋身，平時少食到，係滋補湯水。
再上帶子芙蓉蛋，面層有黃金汁原來係甘筍煮成嘅獻汁，下面水蛋非常滑，仲有一粒大帶子滲透濃汁。
生猛海班有兩吃，分別係黑松露醬炒斑球，斑球厚切一塊塊，好爽肉，有香噴噴嘅黑松露香味，還有甜豆秀珍菇同彩椒，非常夾嘅配搭。
另一食係明梅醬燜頭腩，好酸甜梅醬梗梗包住炸過既頭腩，酸甜惹味。
仲有陳皮骨，店員用心介紹超過10年嘅陳皮磨成粉醃製黑毛豬嘅陳年骨非常入味，有陣陣回甘甜味，而豬肉係用左黑毛豬，帶少少肥肉，令咬口唔會韌。旁邊還有新鮮龍珠果，令口腔可清新一下。
感覺已好滿足之時，原來仲有兩道菜，分別係魚湯浸溫室豆苗，魚湯味濃令豆苗索晒魚鮮味。
最後係黑蒜帶子炒飯，炒至乾身，黑蒜黏口清甜，帶子彈牙仲有脆肉瓜添。
壓軸還有鮮果併盤，非常滿足既一餐，
臨走時更有幸見到主廚榮哥親切地同其中一圍賓客打招呼同介紹菜色，好親切。
又見到餐牌寫Facebook like及打咭會有汽水贈送，都參與吓，咁好食等多啲朋友知都好嘛。
埋單每人三百幾食到咁雅緻既巧手既私房菜，真難得。
