影片
更多
2012-11-29
17 瀏覽
六家日本拉麵店同時進駐香港，全部集中響同一個全新「拉麵廣場」內!真係諗起都興奮! 一知道已經開業呢個好消息，毫無懸念馬上就要去試。六家中有三家來自東京、其餘分別來自信州、千葉同博多，間間都想試，選擇困難症發作!東京代表『超男』闊身扁麵最特別，一於先試呢間。場內各店約$98一碗麵、$30-$35一客煎餃子，自助形式無需加一。雖然係美食廣場，但環境與大食代當年進駐香港時一樣闊落舒適，是那種「價錢稍貴但仍屬可接受範圍」、「間中一餐食好啲」的用餐地點。每家麵店都有日本人主理，客人走過都會熱情介紹「拉客」，即使客人最終無興趣店員都會向你道謝。Ramen Champion徹徹底底的將日本「拉麵小路」搬了來佐敦，背後老闆聽聞卻是新加坡集團，有趣。更有趣的是，日本人天生都對相機鏡頭敏感，無論在日本還是Ramen Champion這裡，當你拿起相機，即使只是離遠拍張店舖全景，店員非但不會阻止，更會樂意主動站好兼且一直望著鏡頭微笑直至你拍照完畢。這大概跟他們「身處工作場所，若別人要拍照就要充當公司形象大使，將店家專業、統一的形象展現出來」的民族性有關吧。場內中央孤型卡座靠背由紅磚砌成，得個靚字，會勾爛衫的
六家日本拉麵店同時進駐香港，全部集中響同一個全新「拉麵廣場」內!真係諗起都興奮! 一知道已經開業呢個好消息，毫無懸念馬上就要去試。
六家中有三家來自東京、其餘分別來自信州、千葉同博多，間間都想試，選擇困難症發作!
東京代表『超男』闊身扁麵最特別，一於先試呢間。
場內各店約$98一碗麵、$30-$35一客煎餃子，自助形式無需加一。雖然係美食廣場，但環境與大食代當年進駐香港時一樣闊落舒適，是那種「價錢稍貴但仍屬可接受範圍」、「間中一餐食好啲」的用餐地點。
每家麵店都有日本人主理，客人走過都會熱情介紹「拉客」，即使客人最終無興趣店員都會向你道謝。Ramen Champion徹徹底底的將日本「拉麵小路」搬了來佐敦，背後老闆聽聞卻是新加坡集團，有趣。
更有趣的是，日本人天生都對相機鏡頭敏感，無論在日本還是Ramen Champion這裡，當你拿起相機，即使只是離遠拍張店舖全景，店員非但不會阻止，更會樂意主動站好兼且一直望著鏡頭微笑直至你拍照完畢。這大概跟他們「身處工作場所，若別人要拍照就要充當公司形象大使，將店家專業、統一的形象展現出來」的民族性有關吧。
場內中央孤型卡座靠背由紅磚砌成，得個靚字，會勾爛衫的，小心!
呢碗麵份量實在超級大碗，大約係日本當地兩碗嘅份量! 單係芽菜就有一個飯碗咁多!
厚切叉燒三件，屬於乾、硬嘅瘦叉燒，烤得幾香，甜中帶肉味鹹香。呢種乾爭爭嘅叉燒一夾就碎，味道特濃，切粒用來配沾麵係絕配，原塊用來配湯麵則唔係幾夾，始終湯拉麵配有適量肥膏嘅叉燒先係王道。
半熟卵實在太熟喇，冇流心可言，不過尚算滑溜。原隻上唔切開，大扣分。
闊身扁麵麵條煙靭，質感似刀削麵，要用力咀嚼，在我而言係過硬；無奈嘅係浸極都係咁硬嘅。
落單時日本師傅唔會問客人需要嘅麵條軟硬度，亦唔似得一蘭果種方式(由客人親自用紙落單，可以點選軟硬、要唔要走蔥之類)。
雖然我相信客人主動提出的話店方一定願意配合，不過咁樣已經唔係日式服務果種以客為先、響客人未提出已經設想週到嘅風格喇。
麵條蠻掛湯，即使不特別用湯匙每口麵都會吃到些少湯。湯底濃、厚，可惜超級超級鹹。
店方取餐處有自取嘅乾辣椒籽，味道香辣討好，不過濃厚嘅極鹹湯底加上辣味後，味道濃上加濃，要狂飲冰茶解渴。
整體來講「超男」呢碗「人氣no.1」嘅『豬骨濃湯半熟蛋拉麵』算係好味嘅，麵條口感亦都有新鮮感，不過咁重口味嘅湯底，實在只宜選配沾麵而非湯麵。
睇返openrice此店嘅其餘食評，對於湯底有一半人話味淡、另一半則話太鹹。似乎並唔係個別客人口味問題，而係店方出品時鹹時淡! 是開店不久店方尚在不斷調較地道化口味嗎?
同一餐飯我亦有淺嚐同場鄰店「無双」的拉麵。「無双」的麵質軟硬適中、湯底清淡得宜，加入一點蒜蓉即刻有如畫龍點睛般香口。半熟卵是流心的，叉燒也是肥美可口不會過鹹的，總之就是大多數香港人會愛上的那種「日本拉麵」。鄰店對手已調較到適合香港人卻不失日本傳統嘅口味，「超男」是被比下去無誤。
題外話/補充資料：
[b]p.s. Ramen Champion六家麵店要試就要快! 12月9日TVB飲食節目一出街，以香港人嘅性格...無眼睇...[/b]
(以上食評乃用戶個人意見 , 並不代表OpenRice之觀點。)
張貼
