老厝邊 (已結業)

呢D時勢，落街食飯都唔想去咁遠，呢個時候街坊食堂最重要！大角咀新開左間台灣嘢叫「老厝邊」（唔識讀「厝」字...）﹐入到去牆上有介紹意思原來係「老鄰居」。新鋪開張，地方好乾淨，成餐飯都住播周杰倫，好leung但又好啱feel。街坊醫肚最緊要大件夾抵食，滷肉飯便當份量足、又有菜有豆腐，罪惡食物鹽酥雞亦都比想像中多，一D都唔吝嗇，但係就咸左少少。以前食開甜不辣都有甜醬，呢到就無，以為會好「寡」，但食落又有驚喜，煙煙韌韌令人停唔到手。最鍾意碗大腸麵線，有大、細之分，細嘅都好足料，麵線唔會太稀，又唔會太結，剛剛好，而且味道濃郁，下次唔食飯食碗大嘅。食台灣嘢又點可以無珍珠奶茶，甜度適中（正常，無叫少甜），珍珠份量慷慨。近排出街食飯，間間鋪都得一、兩枱客，今日難得見到呢到得一張吉枱，我諗都係信心之選。價錢公道，食物選擇豐富，總有一款係你嘅心水！