彩龍茶樓

營業中

休息中

今次要介紹嘅係大帽山附近嘅彩龍茶樓，記得上次行完大帽山，好想快啲去搵嘢食，行到山腳有間茶樓，咁就即刻去食啦。間酒樓開好早嘅，行完夜山落去都有得食早餐。呢一間酒樓係自助形式，無論你沖茶，拎餐具定係拎點心，都係自己一手一腳包辦嘅。上次叫咗馬拉糕，雞扎，菜苗餃，跟住仲有燒賣，蝦餃同埋山水豆腐花添。記得兩個人食咗咁多樣嘢除翻開一人＄70左右，個人覺得都幾抵，因為平時響美心酒樓飲茶都幾貴。＄70食咗咁多樣嘢都唔錯啊。首先講吓個馬拉糕先，個馬拉糕整得幾鬆化。唔會太過甜，啱啱蒸起熱辣辣好好食。雞札大大件，入面有火腿，雞肉，魚肚等等，不過就比較咸少少。魚肚吸哂肉類嘅味道，入晒味好好食。菜苗餃可能唔夠熱嘅關係，感覺冇咁好食。不過都食得出足料，食到有幾隻蝦。蝦餃同燒賣呢，蝦餃就淡淡地，用料都好足，大大隻蝦餃幾彈牙。燒賣食落比較鹹，落少啲鹽會比較好。不過燒賣啲豬肉同埋蝦都幾滑，唔錯唔錯。臨走之前食埋個山水豆腐花，豆腐花好似係用山水來做，感覺特別香滑。不過豆腐花嘅質地比較鬆散，好容易變咗做豆漿。總結一下，行完山肚餓乜嘢都好食架啦，不過山腳有間茶樓咁方便都真係唔錯。