翠林辣蟹舫

營業中

休息中

疫情緩和左，同朋友約出嚟聚餐想食好少少。我係呢頭返工，再加上平時好鍾意食蟹，次次經過都想食，所以就膽粗粗去咗呢間想食好耐嘅餐廳試下。大約七點去到，唔算多人，餐廳四成滿，唔使等位就入得，座位之間幾闊落，坐得幾舒服。講翻食物先，三個人總共嗌咗五個餸。本身麻麻地食蠔，成日驚佢嗰浸海水腥味，但呢度個薑蔥生蠔煲，隻隻蠔都好大隻，好肥美好飽滿，仲要一啲都唔腥。睇食評嗰個都有叫個食神炒飯，就叫咗碟嚟試吓。個炒飯擺盤幾得意，放到成條鯉魚咁。佢嘅分量亦都比想像中多，好足料，啖啖都食到蝦粒同蟹子。而香辣土豆絲同雞煲就中規中矩，冇乜特別，可能因為已經食得太飽。最後當然有佢嘅招牌菜，避風塘香辣蟹。一上枱見到啲炸蒜慷慨嘅份量已經好吸引，隻蟹基本上已經拆好，唔需要太花功夫，稍為用個鉗鉗兩三下就已經剝到殼。隻蟹好厚肉，好新鮮，肉質鮮甜，連一個平時出街食飯因為懶唔會用手食嘢嘅朋友都爭住黎食。 食淨啲炸蒜我忍唔住用嚟撈飯食，好㘃味，好想打包返屋企。