鳴門割烹料理 (已結業)

九龍灣返工的朋友都應該知道，九龍灣工業區出名係美食荒漠，好似除左megabox就咩都無！老公早幾日話之前食過有間日本野幾好食，帶我去荒漠食好西先～今次呢間叫鳴門割烹料理（九龍灣）我地叫左兩個Set，老公叫左個豐御膳(一人前)，我就叫左個北海道什錦丼飯定食，老公個餐有好多野食，有３款刺身，又有天婦羅，不過最勁就係壽司8件，嘩！我第一次見到個壽司擺盤好似食緊港女Tea咁，哈哈好靚！壽司飯夠軟同暖暖地，新鮮手握感覺，材料都好新鮮！仲有個迷你牛肉烏冬，個烏冬牛味好重，我飲湯都飲到重牛味。至於我個丼飯都好足料，滿滿的魚生，仲有只大的牡丹蝦～作為為食妹點會淨係食個丼飯就夠，見到有飛機直送，即刻心心眼左，店員推薦黃鯛，我對鯛魚真係不能抗拒，即刻叫左條黎試下，第一次食黃鯛，肉質少少彈牙，有咬口，唔係好淋嗰種，魚味唔算太濃，唔係好重魚油味嗰啲，點少少醬油帶出淡淡的鮮味，美中不足就係條魚太少啦，咁好食得咁少點夠丫！！！最後跟餐配埋雪糕，完美的約會！