米走雞 (昭德大廈) (已結業)

上星期去咗長沙灣附近醫院探完病同老公揾地方食晚飯，行過兩條街見到呢間火鍋店門口好多人等位，行埋去睇吓個餐牌板介紹“招牌黄金芝士雞煲”！咁特別又真係未試過喎，就係咁我地就試吓啦！雖然排我哋前面有幾枱但我哋都只係等咗十幾分鐘就有枱，都算ok啦！鋪内真係好熱鬧，我倆坐低後即刻點咗個招牌芝士雞煲，加幾款配料:芝士塊+公仔面，魚歡喜，菜，響鈴。。。 香噴噴芝士雞煲好快就送上，鋪頭好細心，我見到墊枱紙下方有欄溫馨提示教食法，我倆依照紙上指示待雞煲滾熟後不需攪拌先食面層嘅雞件，雞肉滿滿芝士汁味道香濃而不漏，而且份量十足啖啖都係嫩滑雞脾肉，食極都有。。。終於食到七七八八可以放配料喇！魚歡喜即係墨魚滑，金魚形賣相特別吸引，墨魚肉爽口彈牙咬落仲啖啖食到有蟹子粒非常有質感，好好味^^平時打邊爐都勁愛食響鈴嘅我，貪佢放湯兩秒即刻有得食，而且今次配嘅係芝士湯汁更覺特别精彩！最後梗係到食重頭戲**芝士公仔面**啦！.....正當我哋想問職員究竟係咪芝士+公仔面要同步放湯時，職員就笑笑口回覆話:芝士放公仔面上面同步放湯係啱呀，但下次應該食完雞未加湯滾其他配料前就可以食芝士+公仔面先，咁先至係原汁原味嘅芝士公仔面呢！