The Place

朋友生日，佢想食芝士自助餐，就帶佢黎呢度。原來恆生信用卡有77折，咁五百幾蚊有咁多嘢食算係唔錯架喇。入到去有好大空間感，樓底又高，就算坐滿曬都唔會好嘈。第一樣梗係食生蠔先啦。師傅開蠔快手，又沖洗得乾淨，唔會食食下有蠔殼。生蠔多汁又鮮甜，其他凍盤都好鮮味，算叫做中上質素。刺身都好新鮮，不過有其他嘢食更吸引，就係芝士焗龍蝦同帶子喇。帶子雖然細細粒，但加埋上面香濃芝士冇得頂。四式芝士焗龍蝦，芝士好creamy，一定要熱辣辣食先香口。佢仲有兩款軟芝士同兩款硬芝士俾你食。我覺得最左面嗰隻硬芝士最香最好食。最右面嘅山羊芝士接近藍芝士咁濃味。唔鍾意騷味者千祈唔好試。飲咗個蟹肉忌廉湯，質地幾好，唔會太鹹，都算多蟹肉，唔錯。仲有個日式鮑魚沙律，有好香麻油味。呢個配搭幾新穎。其他熱盤就冇乜驚喜，我主要食海鮮。甜品都算多選擇，但我唔係太好。朋友就食得好開心喇。最估唔到係個芝士梳乎厘，原來可以原來係咁好食嘅。咸咸甜甜，仲要即刻焗三分鐘有得食。