歇腳亭 (已結業)

芝士奶蓋最近係臺式飲品店掀起一陣風潮，差不多各大型連鎖臺式飲品鋪都會買到，今日行經銅鑼灣時代廣場對面的<歇腳亭>。天氣再凍都要飲！店鋪位於時代廣場大鐘對面，小食檔和藥房隔籬，其實嗰條路有幾逼有幾狹窄大家都好清楚，再加上鋪頭自己伸咗一個工作臺出來令條路窄上加窄，喺度等真係逼到隨時唔俾人撞死都會俾拉喼碌到腳趾講返個芝士奶蓋系列，有鐵觀音，綠茶和紅茶三種茶類，全部定價$30，定價合乎市價。喺條咁逼咁窄嘅路等十分鐘真係好難捱，終於都捱到杯嘢到手。雖然到而家我都唔明一樣嘢，奶蓋應該係一早整好，茶飲落應該係冇糖嘅，我都唔明點解我順口講話小糖佢又真係照打單然後少到俾我。最唔明嘅係，點解咁簡單嘅嘢連同另外一杯正常嘅珍珠奶茶要等成十分鐘咁耐。講返杯茶先，其實個芝士奶蓋係好味嘅，分量亦都合理，但係就久唔久會飲到一粒粒未完全攪勻嘅奶蓋粒，公平地說唔係粉粒，所以我估佢應該係由好杰好杰嘅奶蓋濃漿再加水開成。下層的茶亦夠濃味夠甘香。其實收銀嘅服務態度同埋要等咁耐真係令到服務分好低，幸好飲品質素挽回不少分數，屬ok水平，會有下次幫襯。