串Grill 自助燒烤專門店 (廣華街) (已結業)

平時燒烤就食得多，但燒烤好易燒得唔均勻，所以今次黎到依間燒烤專門店。佢除左可以任食，仲有自動旋轉嘅燒烤裝置，餐廳仲提供一張燒烤時間建議表，好適合懶人去食，又唔驚燒得唔熟。佢有好多種肉類可以揀，常見嘅豬牛羊雞都有，佢仲提供醬同調味品，有幾種食材值得推介。紐西蘭牛西冷同美國牛肋腩都唔錯，牛西冷肉質好，滲着油花，而牛肋腩食落鬆軟，瘦肥均勻，拍得上平時煎嘅牛扒。五花肉都好值得一揀，因為佢係豬肉裡面最嫩同多汁嘅肉，但食落唔會有過多油脂積聚嘅感覺。佢都有唔同嘅選擇可以揀，烤墨魚丸同魚肉年糕都唔錯，墨魚丸粉感唔會重，中間有墨魚粒，而魚肉年糕係韓國嘅魚糕，味道都唔錯。烤甜薯同菠蘿係每次燒烤都會點，因為蕃薯嘅香甜係好正，而烤菠蘿更加食到菠蘿嘅甜味。而甜品方面，佢可以燒棉花糖同雞蛋仔，佢嘅自動旋轉燒烤裝置令人好滿意，唔會擔心棉花糖燒燶左，燒棉花糖係一定要點。雞蛋仔嘅形狀好似豆沙包，食落都唔錯。佢每人都送一杯Haagen Dazs雪糕，真係好開心。而飲品大部份都係鴻福堂嘅，感覺上好健康。