海樂餃子店 (已搬遷) 新店位置

見有餃子店新開，諗住試吓。中午十二點二十分左右，店內坐滿人，門口有兩個兩位等緊，我一位等第三張。5分鐘左右有位，坐最近廚房嗰張。餐牌上有大約十二款嘅餃子，可以淨餃雙併，所以同一位較年輕嘅女侍應叫左韮菜併咖哩薯仔餃，佢仲覆我一次，冇錯先落單，去到呢度都好正常。等左10分鐘上左餃子，食第一隻發現係京蔥羊肉😡😤我對羊食物敏感，吐都吐唔切，跟住我同另一年長啲嘅女侍應講話佢俾錯我，佢就問新嚟女侍應話「你係咪落錯單呀？」，我搭嘴話佢有同我覆單先落，我話你換番咖哩薯仔俾我啦！年長女侍應竟然話「我哋啲餃全部都係咁靚㗎，你食啦！」我再叫佢換，佢攞走左成碗餃子同我咬開左嗰隻京蔥羊肉餃俾男老闆睇，男老闆竟然話「點會俾錯你呀？羊肉貴咁多！係咖哩餃嚟㗎，啲餃全部都係我包嘅，我會唔知！？係豬肉嚟㗎，你食啦！」我話「明明就係羊肉，我唔食得喎！」佢依然堅持自己冇錯！😡😡😡😡成餐飯一肚氣！我當然冇食到羊肉餃，仲每隻都夾開俾番佢睇裡面。其實啲餃子味道唔好，明顯係用雪藏豬肉，調味過濃，完全冇餡料嘅鮮味，再講個湯底又唔係好飲都唔知點解可以賣咁貴！態度差又唔好食，應該唔捱得幾耐喇！