百樂小館 (已結業)

老細話收工請食飯，咁就一於選擇間近近地既係公司附近，打電話去book枱，好在約到，餐廳話係預約枱最後一張。黎到餐廳，果然接近滿座，留左有梳化位既枱，同事介紹叫左招牌菜潮州凍黃油烏魚，呢條唔係普通烏頭，係黃油烏頭魚呀，所以食落係零舍唔同架，淡淡黃油香味加上烏頭既鮮甜味道，無得頂呀，由於係潮州凍食，食起上黎肉質更滑，但入口又變左即溶喎。天氣咁乾燥，當然要叫返煲湯飲下啦，呢煲杏汁白肺湯就夠晒時令啦。湯汁白白的，充滿著南北杏既香滑，飲落就知養顏，豬肺仲可以當一味餸咁食添，因為豬肺清潔得好乾淨，而且口感彈牙又夠爽，加上湯底有雞同金華火腿黎做底，令味道更豐富。最後係黃金炸雙棗，係充滿潮州風味既一道小菜，將佢地炸到金黃香脆，然後裡面好足料，分別係蝦棗同埋蟹棗，口感彈牙又夠爽，點少少醋令味道鮮味更出，確實係一味風味小菜。