The Stadium (已結業)

環境4分：美式酒吧餐廳格局，地方好大好多位，除左有好多個電視睇Ｄ球賽直播同重播之外，入面仲有好多遊戲玩，Halloween就到仲有得意佈置，好有氣氛，可以畀四分。衛生4分：位同位之間空間感足夠，地方都好乾淨企理，一樣可以畀四分。服務 5分：樓面好多服務員，快手快腳，又唔會比壓力Ｄ客，比佢五分。味道4分：1)      特色凱撒沙律D生菜好新鮮好爽脆好juicy，Ｄ脆卜卜嘅麵包碎辣辣地好嘢味，最正就係果隻又白又滑嘅溫泉蛋。2)      烤鱸魚主菜有兩塊煎到好金黃嘅鱸魚，下面有薯蓉配clam chowder醬汁，食落口都算滑，味道足夠又唔腥。魚肉同薯蓉比例都算多，絕對飽肚。3)      而家做緊全日happy hour，大大杯生啤都係三十八蚊雞，有Hoegaarden同Stella任君選擇。抵食5分：其實嚟到唔使一定要叫嘢食，直播睇住波，同埋飲住特價啤酒，真係天衣無縫嘅組合，五分！