長阪燒 (已結業)

某日機緣巧合下，喺OpenRice睇到介紹，長阪燒有半價壽司優惠。於是就同男友約好時間，過嚟品嚐美味嘅壽司喇！今次係我第二次幫襯長阪燒，佢嘅位置都幾方便，就係朗豪坊正門口向右手邊方向直行兩分鐘左右，砵蘭街189號2樓。由於現時仍然維持晚市禁堂食的關係，故此下午茶時段仍然非常旺場。講返食物質素，我地點咗兩碗拉麵套餐，包咗前菜小食、沙律菜同埋麵豉湯嘅。當兩碗熱辣辣嘅拉麵端上嚟嘅時候，簡直令人眼前一亮！因為索價$78一碗拉麵竟然有溫泉蛋一隻喺裡面啊！我點咗叉燒拉麵，一共有四片，肉質軟腍香口，冇多餘肥膏！男友就點咗豬軟骨，裡面嘅豬軟骨份量都頗多，而且都炆得好腍，入口即溶。另外我地再點咗七種類壽司，分別係吞拿魚蓉軍艦、甜蝦、赤蝦、油甘魚、平目魚、八爪魚及鰻魚牛油果卷。店家用上赤醋米飯，配上新鮮魚肉刺身，真係份量十足架！之後我地仲點咗兩個即叫即蒸嘅茶碗蒸蛋同埋蜆肉麵豉湯！蒸蛋十分滑溜而且蛋味濃，裡面仲有一舊雞肉同一隻蝦。蜆肉共有八隻，每隻都好厚肉，食完口腔裡都洋溢住海鮮嘅味道呢！店家的服務亦十分殷勤，讓食客有賓至如歸的感覺！實在很讚！有機會再來幫襯的！