埠 (已結業)

忙左成個月，今晚想靜靜地食個飯，比自己思緒沈澱一下，又唔想揸車去到禁遠。左諗右諗，就去左西灣河 SOHO EAST 搵下有咩好食。去到西灣河渡輪碼頭附近，泊好架車，見到碼頭有間日本野，大大隻”埠”字。行去睇一睇 menu，原來食串燒，口痕痕就一於就入去試下喇！環境一流，望住個海，心情都好啲。人唔算多，夠晒靜！睇一睇menu，選擇都幾多。叫左啲平時日本串燒都食到嘅，睇一睇師傅功力。白鱔：燒到個皮好脆，出面有啲地方會燒到出苦味，呢到啱啱好。雞翼：好味喎！啲雞翼唔太肥，燒完出埋啲油，剛剛好。廣島蠔：隻好大隻啲會好啲。紫蘇梅子雞腿肉：呢個好特別，有啲梅子味，幾香口。蔥蒜牛肉：比出面就咁燒牛肉，多左啲蔥蒜，可能我鍾意食蔥蒜，所以又好夾喎。香蔥脆脆拌飯：呢個出面一定無，食之前要撈勻。如果唔夠鹹，可以再加豉油，不過我覺得唔洗再加。已經好好味。松葉蟹肉鍋燒烏冬：蟹唔係好夠多🤣甜品芝士年糕：啱啱好，入面溶晒。正！師傅功夫都幾好，好多樣野都燒到啱啱好，無過左火。同埋我好鍾意佢有個熱石爐仔放係到暖住啲野，好細心，值得讚下。