綠茶餐廳 (創紀之城五期(apm))

營業中

休息中

同朋友想食下大陸菜，第一時間就諗起綠茶，今次又嚟apm分店醫肚！入座後侍應會預設每位奉上龍井綠茶，每次嚟茶款都有啲新意，茶底香濃，飲落幾舒服～不過夜晚飲綠茶都擔心瞓唔着😆新推出嘅蔥香烤豬頸肉賣相吸引，豬頸肉片厚薄適中，肥瘦均勻，香烤味突出，入口唔會太油膩。食到最尾先發現底層原來鋪咗一層綠茶葉，難怪食落有陣淡淡綠茶清香，幾有驚喜！香鍋花菜用五花肉、蒜苗、美人椒同椰菜花一齊炒，香氣四溢，五花肉香口邪惡，啖啖都好惹味。鮑汁燒年糕口感煙韌，配埋五花肉、蒜苗、雞蛋、雪菜，味道唔會太濃，帶點淡淡清香，好有上海年糕feel。三色雞絲涼麵有菠菜麵、南瓜麵、紫薯麵配雞絲，口水汁麻辣帶勁，份量迷你，但味道刺激，幾過癮！不過個人唔係好分到三款麵味道有咩分別😆喉口鮮肉包一定要趁熱食，包皮薄，肉餡多汁，推介大家蘸埋雞絲涼麵個麻辣汁，口感更豐富，簡直係隱藏食法！整體水準穩定，環境舒服，想食中式fusion菜又唔想太heavy，都係會encore之一😀