阿木台灣麵 (豉油街) (已搬遷) 新店位置

旺角超人氣店阿木台灣麵，久仰大名，就算喺隔離街開咗分店，人潮依舊旺盛，等位閒閒哋要一粒鐘以上。早排趁臨收工人流好似少啲啲（其實邊有少吖😂😂😂），終於有機會一試。聽講鹽酥雞便當好好食，本來想叫，不過睇餐牌見到另一項推介鹽酥肉便當，好似比較少見，於是決定食呢個。便當可揀多飯及多肉燥，我當然揀多肉燥😁。當日三款配菜係滷蛋，辣菜脯同花生麵筋，我最鍾意麵筋，甜甜哋又夠 juicy，好入味😋。主角鹽酥肉炸得香口得嚟粉漿又唔會太厚，入面嘅肉質依然保持嫩滑，唔錯👍，不過調味比一般台灣食店輕手，感覺淡口咗少少，呢個時候，枱面嘅鹽酥雞調味粉就大派用場喇，灑少少上面，味道當堂得以提升，變得好滋味😍。