彼此素食 (已結業)

今日同朋友仔行過佐敦, 比呢間特別嘅素食館吸引住. 佢有一個特別嘅名字, 叫彼此素食, 英文名更特別, 叫You and Me. 我地坐低咗之後, 就睇吓餐牌有乜食. 諗嚟諗去都唔知揀乜好. 老闆娘好好人, 佢介紹咗幾味特別嘅食物比我地, 最終我地揀咗黃金海蒸白雪, 越式米紙卷, 蜜汁义燒同例湯木瓜花生眉豆湯.黃金海蒸白雪其實係蒸蛋白, 蛋白好滑溜, 上面個茨汁用送飯認真一流. 蜜汁义燒個質感同口感都好相似, 幾可亂真. 外面甜甜地, 而且脆口, 趁熱食就最好味. 至於個例湯木瓜花生眉豆湯就好好飲, 真係好足料, 而且一D味精都冇, 飲完都唔會覺得口渴. 至於我就最鐘意個越式米紙卷, 好好味, 米紙裡面包住米粉, 青瓜, 蟹柳同肉鬆, 加埋佢地秘製嘅醬汁一齊食, 一啖咬落去, 真係好好味, 一D都唔油膩.成餐飯一D都唔貴, 而且都食到好飽, 值得一提係個甜品, 係咖啡奶凍, 即使好飽都要一試. 個奶凍好香好滑, 而且咖啡嘅香味十足, 簡直係齒夾留香, 值到一試.