段純貞牛肉麵 (Tower 535) (已結業)

星期四晚嘅銅鑼灣無假日咁多人，呢間段純貞牛肉麵座落喺Tower 535地庫B1層，佢個入口相當隱秘，一唔小心行錯就會上咗同一棟大廈嘅寫字樓。之前喺灣仔同旺角東都有食過段純貞牛肉麵，今次係第一次嚟試銅鑼灣分店，感覺相當唔錯。首先，環境新淨、闊落，我地一行二人約7:10pm入座，被安排坐喺餐廳最入面嘅四人卡座，每張枱之間嘅距離充足，非常適合朋友小聚。侍應生嘅服務亦有禮、貼心，整體觀感良好。食物方面，我揀咗紅燒鍵心半筋半肉牛肉麵，套餐價$108(另收加一)，包一杯指定飲品，我選擇咗珍奶。麵身可以揀細麵或者手工麵，由於前兩次喺其他分店食到嘅手工麵口感相當唔錯，所以我決定繼續encor手工麵。手工麵一如既往十分煙韌，配上濃湯同肉質細嫩嘅鍵心牛肉，味道甚佳；不過，美中不足係麵嘅份量略少，呢一點喺其他分店都係一樣；另外，珍珠奶茶頗為遜色，絲毫無茶味同奶味，加上珍珠口感偏削，故不建議揀珍奶。總括而言，段純貞牛肉麵最出色嘅一定係佢嘅牛肉手工麵，飲品則可有可無；建議大家嚟食嘅時候可以淨嗌麵食唔要飲品。