Brass Spoon (已結業)

Brass Spoon嘅越南粉，港島區相信都無人不曉，話哂都係上過米芝蓮嘅食店。以同類菜比較，呢碗粉定價絕對唔平，但由早到晚人潮不斷，精萃在於真材實料、用心製作嘅湯底。無添加味精，加入百斤牛骨長時間燉煮，湯底鮮甜，肉味香濃，清而不油膩。河粉充分吸收湯汁，粉條細滑，一嗦一吸，每一啖都嚐到肉鮮。芽菜、香菜另上，等客人可以自由控制生熟程度。生熟牛肉各有千秋，前者油花較多，口感較滑；熟牛肉應該係近牛腩部位，肥瘦參半，肉質嫩中帶油香。餐廳流動性高，無論攞位、上菜，都唔需要點等，正合香港人追求效率嘅生活模式。