莆田 (PopCorn 2)

營業中

休息中

將軍澳食好味中菜嘅選擇唔多，大部分都係啲連鎖或者大集團式嘅酒樓、 餐廳，比較少有好味嘅中菜館，雖然呢一間莆田都算係連鎖式嘅集團 ，但係佢嘅感覺就比較精緻， 坐得都幾舒服。而就算星期日嘅下午茶嚟講，都唔算好多人。 我同朋友各叫咗一份下午茶，我就叫咗糯米丸同埋扁肉， 主菜就係炒米粉， 再加埋甜品銀耳羮， 作為一人份量嚟講其實都幾多幾豐富。扁肉即係迷你嘅炸雲吞仔 ，我就建議點佢枱面上嗰一罐酸酸甜甜嘅辣椒醬，非常開胃。而炒米粉嘅米粉都非常幼細，炒得都乾身， 仲有一啲炸紫菜同埋蜆肉，撈埋一齊都幾好食。而糯米丸就好似擂沙湯圓， 入面有芝麻餡， 但係唔會太甜，而且皮都幾薄，好食。銀耳羮就雪得夠曬凍，夏日炎炎食佢就最啱，但如果大碗少少就更加好啦。