名館 (已結業)

之前聽朋友講過話呢間中菜幾唔錯，於是呢一日行開銅鑼灣就決定嚟試［海南金桔蜜柚茶，$22］甜甜哋嘅柚子茶加上香噴噴酸咪咪嘅金桔，仲有奇異籽可以𡁻吓，係清新嘅配搭［金石斛花燉鷓鴣，$48］金石斛花同鷓鴣呢兩樣食物都有食療嘅效果。前者抗衰老、抗氧化，後者可醫治脾虛、痰多、虛火盛，而且用鷓鴣燉湯清甜唔油膩，所以呢個係十分健康嘅湯［厚切叉燒皇，$68］半肥瘦叉燒咬落軟腍腍，要趁熱食好大件呀！［京川滑餃子，$32］餃子算皮薄多汁，配上香辣嘅京川醬汁，非常惹味［蜂蜜柚子蝦球，$72］薄薄嘅炸粉炸到脆卜卜，然後裹上蜂蜜柚子，十分新鮮嘅菜式（不過諗諗吓點解同我杯金桔蜜柚茶咁似嘅？）［金銀蒜蒸勝瓜金菇，$42］連蒸籠上，令整個賣相冇咁單調。金銀蒜味非常濃，令本身淡味嘅勝瓜同金菇都變得好有味［黑椒雪花牛仔骨，$65］牛仔骨有冇雪花就睇唔出，但軟腍冇筋，而且黑椒汁做得非常出色、濃味［桃膠香芒西米露，$28］第一次試有平民燕窩之稱嘅桃膠，其實冇乜味，但撈埋芒果同西米露一齊食就又美味又養顏［西瓜椰汁涼粉，$22］原本冇乜期待，但原來涼粉先係最surprising的。咬落去，佢口感似蒟蒻，記憶中冇食過咁好咬嘅涼粉。